ئه‌مڕۆ سێشه‌ممه‌ ١٨/٥/٢٠١٠ د.به‌رهه‌م ساڵح سه‌رۆكی حكومه‌تی هه‌رێم پێشوازیی له‌ خاتوو لوبنا بنت خالید ئه‌لقاسمی وه‌زیری بازرگانی ده‌ره‌وه‌ی ده‌وڵه‌تی ئیمارات و وه‌فدێكی گه‌وره‌ی هاوڕێی كرد كه‌ له‌ (21) دامه‌زراوه‌ی حكومی و كه‌رتی‌ تایبه‌ت و (45) گه‌وره‌ وه‌به‌رهێنه‌ر و بازرگان پێكهاتووه‌.
د.به‌رهه‌م بۆ خاتوو لوبنا و وه‌فدی هاوڕێی ڕوونكرده‌وه‌ كه‌ هه‌رێمی كوردستان زه‌مینه‌یه‌كی له‌باره‌ بۆ كاری وه‌به‌رهێنان و پێشخستنی په‌یوه‌ندی ئابووری و بازرگانی نێوان هه‌ردوولا و لێره‌شه‌وه‌ وه‌ك ده‌روازه‌یه‌ك بۆ هه‌موو عیراق، بۆیه‌ داوایكرد په‌له‌بكرێت له‌ كردنه‌وه‌ی كونسوڵخانه‌ی ئیمارات له‌ هه‌رێمی كوردستان تاكو كارئاسانی بكات بۆ پته‌وكردن و سه‌رخستنی زیاتری په‌یوه‌ندیی سیاسی و ئابووری و وه‌به‌رهێنان و بازرگانی نێوان هه‌ریم و ئیمارات.
له‌باره‌ی كۆڕبه‌ندی بازرگانی هاوبه‌شی نێوان حكومه‌تی هه‌رێمی كوردستان و ده‌وڵه‌تی ئیماراتیش كه‌ بڕیاره‌ سبه‌ی‌ ڕێكبخرێت، د.به‌رهه‌م به‌ بایه‌خه‌وه‌ باسی كرد و دووپاتیكرده‌وه‌ كه‌ كاریگه‌ری باشی ده‌بێت له‌سه‌ر لێكنزیكردنه‌وه‌ی زیاتری وه‌به‌رهێنه‌ران و بازرگانانی هه‌ردوولا، هه‌موو هاوئاهه‌نگی و زه‌مینه‌سازییه‌كیشی بۆ به‌ره‌وپێشه‌وه‌بردنی زیاتری ئه‌و هه‌نگاوه‌ ته‌ئكیدكرده‌وه‌.
له‌لایه‌ن خۆیه‌وه‌ خاتوو لوبنا سوپاسی میواندارییه‌كه‌ی كرد و ده‌ستخۆشی له‌ ڕێكخستنی ئه‌و كۆڕبه‌ندییه‌ كرد و ڕوونیكرده‌وه‌ كه‌ ژماره‌یه‌كی زۆر له‌ وه‌به‌رهێنه‌ران و گه‌وره‌ بازرگانانی وڵاته‌كه‌ی به‌شدارده‌بن و ده‌بێته‌هۆی زیاتر لێكنزیكبوونه‌وه‌ی په‌یوه‌ندییه‌كان و گه‌شه‌پێدانی باری ئابووری و بازاڕ.
وه‌زیری بازرگانی ده‌ره‌وه‌ی ده‌وڵه‌تی ئیمارات ستایشی سه‌قامگیری ئاسایش و ئارامی هه‌رێمی كوردستانیشی كرد و هیوای خواست هه‌موو عیراق به‌و ئارامییه‌ شادببن له‌ پێناو به‌ره‌وپێشچوونی زیاتری وڵاته‌كه‌.
دووپاتیشیكرده‌وه‌ كه‌ ئه‌و بارودۆخه‌ گونجاوه‌ی هه‌رێمی كوردستان، پاڵنه‌رێك و خاڵێكی به‌هێزه‌ بۆ ئه‌وه‌ی وه‌به‌رهێنه‌رانی ئیمارات زیاتر بێنه‌ هه‌رێمی كوردستان و گه‌شه‌ به‌ په‌یوه‌ندییه‌كانیان و كاره‌كانیان له‌م هه‌رێمه‌دا بده‌ن.