ئه‌مڕۆ ٢٣/٥/٢٠١٠ د. به‌رهه‌م ساڵح سه‌رۆكی حكومه‌تی هه‌رێمی كوردستان له‌لایه‌ن مامۆستا سه‌ڵاحه‌دین به‌هادین ئه‌مینداری گشتی یه‌كگرتووی ئیسلامی كوردستان و وه‌فدێكی مه‌كته‌بی سیاسی یه‌كگرتووه‌وه‌ پێشوازی لێكراو سه‌باره‌ت به‌دۆخی سیاسیی عیراق و كوردستان و پشتیوانیكردنی به‌رنامه‌كانی حكومه‌ت بۆ خزمه‌تی خه‌ڵك، گفتوگۆ كرا.
له‌و دیداره‌دا یه‌كخستنی گوتاری كورد له‌سه‌ر ئاستی عیراق و كاركردن بۆ چه‌سپاندنی زیاتری ده‌سكه‌وته‌كان گفتوگۆی له‌باره‌وه‌ كرا، سه‌ره‌ڕای تاووتوێكردنی پرۆسه‌ی پێكهێنانی حكومه‌تی تازه‌ی عیراق به‌شێوه‌یه‌ك كه‌بواری به‌شداری راسته‌قینه‌ی كورد و سه‌رجه‌م پێكهاته‌ جیاوازه‌كانی تێدا ده‌سته‌به‌ر ببێت و پابه‌ند بێت به‌ده‌ستوور‌و جێبه‌جێكردنی بڕگه‌كانی به‌ماده‌ی 140 یشه‌وه‌.
له‌ته‌وه‌رێكی تری دیداره‌كه‌دا سه‌باره‌ت به‌چۆنیه‌تی هه‌ماهه‌نگی حكومه‌ت و ئۆپۆزسیۆن به‌ئاڕاسته‌ی خزمه‌تكردنی زیاتری خه‌ڵك و جێبه‌جێكردنی پرۆسه‌ی چاكسازی، بیروڕا ئاڵوگۆڕ كراو ته‌ئكید كرایه‌وه‌ پێویسته‌ ئۆپۆزسیۆنیش له‌شوێنی خۆی رۆڵ ببینێت و پشتیوان و هاوكاری به‌رنامه‌ی حكومه‌ت بێت بۆ پێشكه‌شكردنی خزمه‌تگوزاری زیاتر به‌هاووڵاتیان و چاره‌سه‌ركردنی كه‌موكوڕی و كێشه‌كان.
له‌دیداره‌كه‌دا ته‌ئكیدیش كرایه‌وه‌ كه‌له‌ماوه‌ی رابردوودا حكومه‌تی هه‌رێم ده‌سكه‌وتی گرنگی به‌ده‌ستهێناوه‌ كه‌ جێگه‌ی دڵخۆشی هه‌موو لایه‌كن، به‌ڵام كه‌موكوڕی و ناته‌واویش هه‌ن و پێویسته‌ به‌یه‌ك ده‌ست رووبه‌ڕوویان ببینه‌وه‌.