ئه‌مڕۆ سێشه‌ممه‌ 24/8/2010 له‌شاری هه‌ولێر د. به‌رهه‌م ساڵح سه‌رۆكی حكومه‌تی هه‌رێمی كوردستان به‌ئاماده‌بوونی پارێزگاری هه‌ولێر، پێشوازیكرد له‌محه‌مه‌د بن هه‌مام، سه‌رۆكی یه‌كێتی تۆپی پێی ئاسیا، كه‌هه‌ردوو سه‌رۆكی یه‌كێتی تۆپی پێی عیراق و كوردستان و ژماره‌یه‌ك وه‌رزشكار یاوه‌ری بوون.
له‌و دیداره‌دا، سه‌رۆكی تۆپی پێی ئاسیا ئاماژه‌ی به‌وه‌دا كه‌حكومه‌تی هه‌رێم پاڵپشتی زۆری وه‌زش و وه‌رزشكارانی عیراق و كوردستانی كردووه‌، كه‌جێگه‌ی ده‌ستخۆشی و سوپاسی یه‌كێتییه‌كه‌یانه‌، هه‌روا باسی له‌و پێشكه‌وتنانه‌ش كرد كه‌له‌بواری وه‌رزش له‌هه‌رێمدا وه‌دیهاتوون، هه‌ر له‌و چوارچێویه‌دا هاوكاری حكومه‌تی هه‌رێمی بۆ یه‌كێتی تۆپی پێی عیراق به‌گرنگ وه‌سفكرد و وتی: "ئه‌م هاوكارییه‌ نیشانه‌ی ئه‌وه‌یه‌ كه‌هه‌رێم ده‌یه‌وێت به‌یه‌ك چاو و دوور له‌سیاسه‌ت سه‌یری وه‌رزش له‌هه‌موو ناوچه‌كانی عیراق بكات.
محه‌مه‌د بن هه‌مام مه‌به‌ستی سه‌ردانه‌كه‌شی بۆ سه‌رۆكی حكومه‌ت روونكرده‌وه‌ كه‌بریتییه‌ له‌بینینی دۆخی وه‌رزشی هه‌رێم له‌نزیكه‌وه‌ و كۆبوونه‌وه‌ له‌گه‌ڵ دامه‌زراوه‌ وه‌رزشییه‌كان.
هه‌ر له‌و دیداره‌دا سه‌رۆكی حكومه‌تی هه‌رێم دوای به‌خێرهێنانی وه‌فدی یه‌كێتی تۆپی پێی ئاسیا، روونیكرده‌وه‌ كورد ده‌یه‌وێت رۆڵی چاره‌سه‌ركردنی كێشه‌ و ناكۆكییه‌كان له‌عیراق ببێنێت، له‌بواری وه‌رزشیش به‌هه‌مان شێوه‌ ده‌مانه‌وێت ژینگه‌یه‌كی له‌بار بۆ كایه‌ی وه‌رزش و وه‌رزشكارانی عیراق بێته‌ كایه‌وه‌ كه‌دووربێت له‌ده‌ستوه‌ردانی سیاسی و نوێنه‌رایه‌تی سه‌رجه‌م خه‌ڵك بكات به‌بێ جیاوازی.
هه‌ر له‌درێژه‌ی وته‌كانیدا، د. به‌رهه‌م ساڵح وتی: "حكومه‌تی هه‌رێم ده‌یه‌وێت پاڵپشتی وه‌رزش بكات، نه‌ك ده‌ستبخاته‌ ناو كاروباره‌كانی، كه‌ئه‌مه‌ش بۆته‌ هۆی ئه‌وه‌ی وه‌رزش له‌كوردستاندا گه‌شه‌بكات و ده‌ره‌نجامی باشیش وه‌ده‌ست بێنێت، باسی له‌وه‌شكرد كه‌حكومه‌تی هه‌رێم به‌گوێره‌ی به‌رنامه‌یه‌كی دارێژراو كار بۆ ئه‌وه‌ ده‌كات ژێرخانێكی باش بۆ وه‌رزش دروست بكات و به‌شێكیشی جێبه‌جێكراوه‌.