ئه‌مڕۆ 23/1/2012 له‌شاری هه‌ولێر به‌ڕێز د. به‌رهه‌م ساڵح سه‌رۆكی حكومه‌تی هه‌رێمی كوردستان پێشوازیكرد له‌به‌ڕێز یوسف ده‌میرێر باڵیۆزی نوێی توركیا له‌عیراق و وه‌فدێكی هاوڕێی و سه‌باره‌ت به‌وه‌زعی سیاسی عیراق و په‌یوه‌ندیه‌كانی نێوان هه‌رێم و توركیا گفتوگۆیان كرد.

له‌م دیداره‌دا هه‌ردولا باسیان له‌مه‌ترسی كێشه‌و ناكۆكیه‌كانی مه‌یدانی سیاسی عیراق كرد بۆ سه‌ر به‌رژوه‌ندیه‌كانی خه‌ڵك و ئارامی ناوچه‌كه‌ش، هه‌روا ته‌ئكیدیشیان كرده‌وه‌ كه‌سه‌رجه‌م لایه‌نه‌ سیاسیه‌كان دوور له‌گیانی تایه‌فی و به‌رژوه‌ندی تایبه‌تی هیچ گروپ و لایه‌نێك ره‌فتار بكون بۆ ئه‌وه‌ی قه‌یرانه‌كان گه‌وره‌تر نه‌بن.

به‌ڕێز د. به‌رهه‌م ساڵح سه‌باره‌ت به‌هه‌ڵوێستی هه‌رێم روونیكرده‌وه‌ كه‌به‌رژوه‌ندی كورد له‌وه‌دایه‌ دۆخی سیاسی و ئه‌منی عیراق ئارام  بێت بۆ ئه‌وه‌ی بتوانین باشتر خزمه‌تی خه‌ڵك بكه‌ین و وه‌لامی پێداویستی ئه‌م قۆناغه‌ش له‌گه‌شه‌پێدانی پرۆسه‌ی سیاسی و چه‌سپاندنی دیموكراسی و ژیانی ده‌ستووری و دامه‌زراوه‌ی بده‌ینه‌وه‌، هاوكات ته‌ئكیدیشی كرده‌وه‌ هه‌رێمی كوردستان كار بۆ ئه‌وه‌ ده‌كات سه‌رجه‌م كێشه‌و ململاتێكان به‌رێگه‌ی ئاشتی و گفتوگۆو لێكگه‌یشتن چاره‌سه‌ر بكرێن.

له‌ته‌وه‌رێكی تری كۆبوونه‌وه‌كه‌دا سه‌باره‌ت به‌په‌یوه‌ندیه‌ سیاسیه‌كانی نێوان هه‌رێم و توركیا بیروڕا ئاڵوگۆر كرا و ته‌ئكید له‌گه‌شه‌پێدانی ئه‌و په‌یوه‌ندیانه‌ كرایه‌وه‌، دواتر باس له‌ئه‌نجامی سه‌ردانی وه‌فدی توركیا بۆ كوردستان كرا بۆ به‌هێزكردنی په‌یوه‌ندی بازرگانی و هاریكاری كه‌رتی تایبه‌تی هه‌ردولا.