دكتۆر به‌رهه‌م ئه‌حمه‌د ساڵح سه‌رۆكی‌ لیستی‌ كوردستانی‌ سه‌ردانی‌ شه‌قامی مه‌وله‌ویی شاری سلێمانیی كرد و له‌گه‌ڵ‌ كاسبكار و پیشه‌وه‌ر و بازرگاناندا بیروڕایان ئاڵوگۆڕ كرد له‌ باره‌ی‌ چۆنیه‌تی‌ گه‌شه‌پێدانی‌ بواری‌ ئابووری‌ و بازرگانی‌ و به‌رنامه‌ی‌ لیستی‌ كوردستانیی له‌و بواره‌دا بۆ شیكردنه‌وه‌ و ته‌ئكیدی كرده‌وه‌ لیستی‌ كوردستانی‌ به‌رنامه‌یه‌كی‌ جددیی هه‌یه‌ بۆ په‌ره‌پێدانی‌ بواری‌ ئابووری‌ و ره‌خساندنی‌ زه‌مینه‌یه‌كی‌ له‌ بار تر بۆ پێشكه‌وتنی‌ بازرگانی‌ له‌ هه‌رێمی‌ كوردستاندا.

ئێواره‌ی 16\7، دكتۆر به‌رهه‌م ئه‌حمه‌د ساڵح سه‌رۆكی‌ لیستی‌ كوردستانی‌ له‌ نێو ئاپۆڕه‌ی‌ كاسبكار و پیشه‌وه‌ر و بازرگاناندا گفتوگۆی‌ كرد له‌ باره‌ی‌ ره‌وشی‌ ئه‌مڕۆی‌ كوردستان له‌ بواره‌ جیاجیاكان و به‌تایبه‌ت له‌ بواری‌ ئابووری‌ و بازرگانی‌ و ئاماده‌كارییه‌كانی‌ هه‌ڵبژاردن و به‌رنامه‌ی‌ هه‌مه‌لایه‌ن و جددیی لیستی‌ كوردستانی‌ كه‌ چه‌ندین ته‌وه‌ر و بوار له‌ خۆ ده‌گرێت و كار ده‌كات بۆ بره‌و پێدانی‌ بازرگانی و پیشه‌سازیی ناوخۆیی و ره‌خساندنی‌ زه‌مینه‌ی‌ له‌ بار بۆ گه‌شه‌كردنی‌ ئه‌و كه‌رته‌ گرنگ و هه‌ستیاره‌، هه‌روه‌ك جه‌خت ده‌كاته‌وه‌ له‌سه‌ر پشتگیری‌ كردنی‌ كاسبكاران و گه‌نجان و ده‌رچووانی‌ زانكۆ و په‌یمانگاكان بۆ دامه‌زراندنی‌ پرۆژه‌ی‌ تایبه‌ت به‌ خۆیان له‌ رێگه‌ی‌ پێشكه‌شكردنی‌ قه‌رزی‌ بچوك و مام ناوه‌ندی له‌ رێگه‌ی‌ بانكه‌ حكومی و ئه‌هلییه‌كانه‌وه‌ و پێدانی‌ قه‌رزی كه‌م سوودی‌ ماوه‌ درێژ و حكومه‌ت به‌رنامه‌یه‌كی‌ هه‌بێت بۆ پێشكه‌شكردنی‌ كۆمه‌كی‌ دارایی بۆیان.