سەرۆکی حکومەتی هەرێمی کوردستان و مۆڵی فی ئەندامی ئەنجومەنی ئاسایشی نەتەوەیی  ئەمریکا سەبارەت بەپرۆسەی سیاسی عیراق و پەیوەندی نێوان ئەمریکاو عیراق و هەرێم و دۆخی ئەمنی گفتوگۆیان کرد.
ئەمڕۆ 11/5/2010 لەتەلاری ئەنجومەنی وەزیران لەشاری هەولێر د. بەرهەم ساڵح سەرۆکی حکومەتی هەرێمی کوردستان پێشوازیکرد لەخاتوو موڵی فی ئەندامی ئەنجومەنی ئاسایشی نەتەوەی ئەمریکا.
 لەدیدارێکدا پەرەپێدانی پەیوەندیەکانی نێوان ئەمریکاو هەرێم و عیراق و هاوکاریکردنی کوردستان لەبوارە جۆربەجۆرەکان باسی لێوە کرا، سەرۆکی حکومەتی هەرێم ئاماژەی بەوەکرد  کەهاوکاریکردنی  هەرێمی کوردستان لەلایەن ئەمریکا  لەزۆربەی بوارەکاندا بەتایبەتی لەبواری ئاوەدانکردنەوە خوێندن و گەشەپێدانی ژێرخانی ئابووریدا گرنگە لەکاتێکدا کە ئاسایش و ئارامی تێدا بەرقەرارەو دەرفەتی زیاتری پتەوکردنی پەیوەندییە سیاسی و بازرگانییەکان هەیە.
  هەر لەو دیدارەدا  سەبارەت   بەهەلومەرجی سیاسیی عیراق و هەوڵەکانی پێکهێنانی حکومەتی تازە گفتوگۆ کرا، د. بەرهەم ساڵح روونیکردەو کەکورد دەیەوێت لەچوارچێوەی دەستوور و بەرژەوەندی هاوبەشی سەرجەم گەلانی عیراق کار بۆ پێکهێنانی حکومەت بکرێت و بەشداری گشت لایەنەکانیش لەحکومەت و وەرگرتنی بڕیاردا بەشداریەکی راستەقینە بێت، راشیگەیاند پێویستە لەپێناو تێپەڕاندنی ئەو قۆناغە هەستیارەدا هەموو لایەک بەگیانی لێپسراوێتی نیشتمانی کار بۆ پێکهێنانی حکومەتێک بکەن کەهەموو عیراقیەکان بەهی خۆیانی بزانن و بتوانی بەیەک چاو خزمەتی سەرجەم پێکهاتەکان بکات.